AZƏRBAYCAN RESPUBLİKASININ SİYASİ SİSTEMİNDƏ BLOKLAŞMA PROSESLƏRİNİN ÇOXPARTİYALI DEMOKRATİYANIN FORMALAŞMASINA TƏSİRİ MƏSƏLƏLƏRİ

Məqalədə Azərbaycan şəraitində siyasi bloklaşma prosesinin ilk rüşeymlərinin meydana
gəlməsi, siyasi sistemdə müxtəlif ideoloji əsaslara söykənən siyasi qüvvələrin irəli çıxması
məsələləri tədqiq edilir. Azərbaycan Respublikasının siyasi sistemində bloklaşma prosesi
bugünədək davam etməkdədir. Qeyd etmək lazımdır ki, Azərbaycanda siyasi bloklaşma prosesinin özünəməxsus xüsusiyyətləri vardır. Belə ki, ölkədə demokratiyanın inkişafı kontekstində
siyasi sistemdə perspektivdə olan müxtəlif partiyaların yaranması və çoxpartiyalı sistemin ilkin
əsaslarının qoyulması vacib hadisələrdən idi.
Çoxpartiyalı demokratiyanın əlamətlərindən olan siyasi qüvvələrin bloklaşması prosesinin Azərbaycan təcrübəsi, uğurları, perspektivlərinin təhlili ölkədə demokratiyanın
inkişafının xarakterini müəyyən etməkdə əhəmiyyətli dərəcədə yardımçı ola bilər. Bu mənada
sözügedən proseslərin təhlili vacib əhəmiyyətə malikdir.